*صاحبة القصة مش عايزة تقول أسمها لأسباب شخصية ولكني أضمنلكوا 100% أن القصة حقيقية
أبويا بيضرب أمي من زمان أوي..من قبل ماأتولد..من أيام ما كانوا مخطوبين..ضربها كتير و لأسباب مختلفة وكتير كنت بشوفهم..العيلة كلها عارفة..ده مش سر..و أبويا مش جاهل و أحنا مش ساكنين في العشوائيات..أبويا و أمي متخرجين من جامعة ومثقفين وأحنا من الطبقة الوسطى
ليه فضلت معاه؟ وليه ماتفضلش؟ الموضوع أصلا ماحدش بيتعامل معاه كأنه شيء شاذ أو غريب ولا حتى هي..يمكن عشان كانت بتحبه..يمكن عشان كانت حاسة انها فعلا تستاهل..يمكن عشان أهلها ماوقفوش جنبها أو عشان كانت دايما تقولي الراجل اللي جوازه مر طلاقه أمر...
العنف معدي..هي كمان اتعلمت تضربه حتى لو مش هتوجعوا زي ما هيوجعها أو حتى لو هيضربها أكتر..وبقت تضربني..وهو كمان بيضربني..مرة وأنا صغيرة كسرلي أصبعي
انا اتعودت أوي على الموضوع ده علشان اتربيت عليه..مش بيفاجئني لما بسمع عنه..بس يفاجئني أوي اللي بيقولوا ده مفيش عنف منزلي أو ا ن ديه حالات شاذة..الشاذ هو أنك تلاقي حد يتصدى له
المشكلة أن الناس فاكرة أن حدود العنف اللي من النوع ده هو الأذى الجسدي.. أيد أو رجل تتكسر..بس أقل حاجة بيبقى الألم الجسدي..خدش الذات والإحساس بانعدام القيمة اللي بتحسوا المرأة المعنفة هو أكبر سبب بيخليها تفضل و تستحمل..مش العيال زي مابتقول..العيال اللي بيبقى عندهم نفس الاحساس..منتهى الانتهاك للكرامة الإنسانية اللي بيمارس يوميا جوة بيوتنا
أنا مش بكره أهلي ولا بتكلم عشان أصعب على حد وأستجدى شفقة..أنا بتكلم عشان اللي بيقول العنف المنزلي ده غير موجود بقولوا أنت متعرفش أيه اللي جوة البيوت
No comments:
Post a Comment