طبعا من العنوان هتقولوا ايه الطالية القليلة الأدب دي اللي مش بتحترم أستاذها اللي كلنا اتربينا على ان دكاترة الجامعة دول من أكتر الناس احتراما في المجتمع..بس ده تقريبا طلع وهم(مع الاعتذار للمحترمين طبعا)....أنا كنت طالبة ماجستير في كلية الآداب جامعة القاهرة بعد ما طلع عيني في المواصلات العامة من محافظة لمحافظة المسافه بينهم حوالي ساعتين..كل يوم لمدة سنتين.. و يا يبقى فيه محاضرة يا لاء.. و الله على حسب مزاج الدكاترة بقى .. و بعد السنتين السود دول أخدت التمهيدي بعد طلوع الروح ..و كنت من المحظوظين القليلين جدا في دفعتي اللي تبناني بروفيسور ذو شأن كان رئيس قسم اللغة الانجليزية لحد ما وصل سن المعاش..و زوجته و بنته دكاترة في الجامعه..دكتور له أسمة و مؤلفاته من كتب في النقد و كتب في الشعر و مسرحيات و كتب مترجمة كتير..بس للأسف انسان أ ي كلمة جارحة قليلة عليه..طبعا انهالت عليا العروض من فلوس (استرليني) ههههههههههه( اومال فكرينه بالمصري؟ برستيج بقى) لحد كتابة الرسالة بخط ايده و يكون معايا الماجستير في سنتين و دي اقل مده ممكن الحصول على الدرجة فيها و هينقيلي الدكاتره اللي يناقشوني في الرسالة كمان لأنه غالبا هو اللي بيكون المناقش الرئيسي في الرسالة..ايه رأيكم في العروض الحلوه دي؟ أول مره أعرف ان تحضير رسالة ماجستير بالسهولة دي في مصر..و طبعا عارفين ايه المقابل..ده غير استغلال سنه اللي عدى السبعين في انه يقربلك كجدو هههههههه أنا مكنتش الوحيده اللي حاول يستغلها..معرفش بقى عرض على الباقيين ايه بس انا كنت بشوفه و مفهمتش الا متأخر لأن صورة استاذ الجامعه اللي اتربيت عليها و اللي اهلي طول عمرهم عاوزيني اوصلها كانت صعب أوي تتهز أدامي..بس يوم ما اتهزت اتكسرت مليون حته!!! يا خساره..أنا مش بتكسف اقول اللي حصلي بس أحب أقول للبنات اللي خايفه تتكلم ان ذنب البنات اللي لسه مش فاهمه و بتقع في ايده في رقبتكم..انا الحمد لله عرفت أفلت لأني باخد شهاده عشان يزيد بيها تقديري لنفسي مش اخد شهاده و ابيع نفسي!!! طب اعمل بيها ايه بعد كده!!!! بس الواحد لازم يبقى قوي و ميتكسرش عند اول تجربة..و لا يكتئب و يعد في بيتهم...دور الضحية ده خليه للناس الضعيفة..كلنا عندنا الحق نحافظ على ادميتنا و اللي يمسها ناخد حقنا منه..و لا ايه يا حلوين؟؟ و لا ايه يا د. محمد عناني؟؟؟ نفسنا الجامعات المصرية تنضف بقى.
No comments:
Post a Comment